من اروع ما قيل في الرثاء على الاطلاق وهي من كلمات الشاعر ابراهيم الجمحان رثاء الزوجة
قال من خله توفى واندفن
قبل يجمعهم نصيب بالحياة
اسألك الله بكل اسم حسن
ياكريم اسألك بأعلى الصفات
وارجي انك مع حبيبي تجمعن
وسط جنة عدن من بعد النجاة
راح في عزة شبابه واتركن
فرقتنا قدرة الله يوم مات
شافت عيوني حبيبي بالكفن
شايلينه بالنعش لاجل الصلاة
ابعدوبه عني رجلينٍ عصن
ماقدرن المشي صارن واقفات
قلت يارجلين امشن واركضن
سابقن الريح وانتن جاريات
حاولن المشي لكن ماقون
طاح جسمي يوم صارن عاجزات
صارت عيوني جهتهم ينظرن
ليت رجليني معاهم ماشيات
صحت بأعلى صوت يامن يسعفن
من يسوي خير يجزابه احسنات
مامع المقفي لحد يرحمن
قاسيات قلوبهم مثل الحصاة
مابهم من رقي حين اسمعن
لا ولا منهم تكرم بالتفات
صرت انا ازحف فوق صدري والبطن
واختلط دم ودموع سايلات
دم جسمي من عروقه ينزفن
من كثر زحفي على ارض الفلات
مع دموع من عيوني يذرفن
من كثر نوحي على حسن الصفات
اشتكي هم وغرابيل وحزن
داعي ربي مجيب الداعيات
اسالك ياذا الجلال اتحملن
العزا والصبر فيها والثبات
يوم ضاعت حيلتي واتشتتن
جملة افكاري وصارن ضايعات
خايف اوصل قبرها بعد الدفن
لكن الله وصلن قبل الفوات
كن خلي يوم شفته ودعن
قبل دفنه وسط قبره بالحطاة
مامع اللي حاضرن دفنه فطن
حين ما عزوا اهلها بالوفاة
موقفي صعب وفؤادي به مكن
حسرة ظلت جروحه ساطيات
صرت انا من غير ماشعر بس اون
واتقلب من جروح خافيات
فوق قبر فيه محبوبي سكن
علي اركانه لها من ساسعات
قربوا اهله وقالوا انت من
كيف في نفسك تسويه السوات
ضاق صدري زود وعيوني بكن
قلت انا اللي فيه عزوني عزاة
اسألوا قلب لها دايم يحن
حبها ذابت على ارضه دفات
واسالوا عين بكتها في شجن
جرحت خدي دموع حاميات
قالوا انت اللي على لسانه لحن
قبل تتوفى عطتنا لك وصاة
قالت اوصيكم في من حبه فتن
قلبي وروحي لحبه شاهدات
رددت اسمك وهي بين المحن
قالت انه هو اعز الامنيات
كل شئ قبل موتي ذكرن
بأسعد اللحظات واحلى الذكريات
له حبيب الروح لكن الزمن
اصدر احكام علينا جايرات
بالقدر نرضى وللضيقه نكن
وكانت الفرقى وماله مانعات
والقضى لو قاسيه احكامه يجن
بدنا نرضى ولانجزع بتات
وآخر اللي قالته لايقطعن
من زياره مع سلام كافيات
قلت انا متأكد مالي اظن
لا سألت الله بحسن الخاتمات
يستجيب لدعوتي فيها استعن
وماستعين بغير ربي هايفات
ربي يرحمها كريم معينن
يعطي برايه بدون مشاورات
يجعله تسكن بجنات علن
جنة الفردوس اعلى العاليات
والختم صلوا عدد مايظهرن
من نجوم وعد ما بالكاينات
وعد ورد فوق الاغصان اثمرن
للنبي الله سلام وصلوات
موضوع: رثاء للام الحبيبة رحم الله اموات امهات المسلمين جميعا 
الأربعاء فبراير 24, 2010 5:54 pm